– रस्ता बांधकामावरील जेसीबी, पोकलेन व एक हिवा वाहनांची जाळपोळ
The गडविश्व
बिजापूर : छत्तीसगडमधील नक्षलग्रस्त विजापूर जिल्ह्यात नक्षल्यांनी पुन्हा डोके वर काढत रस्ते बांधकामाला लक्ष्य करत गोंधळ घातला आहे. काल शुक्रवारी नक्षल्यांनी रस्ते बांधकामावरील तीन वाहने जाळल्याची घटना उघडकीस आली आहे. सदर घटना विजापूर जिल्ह्यातील नक्षलग्रस्त चेरी कांती गावात घडली. पोलीस अधीक्षक कमलोचन कश्यप यांनी या घटनेला दुजोरा दिला आहे.
प्राप्त माहितीनुसार, चेरी कांती गावात प्रधानमंत्री ग्राम सडक योजनेंतर्गत रस्त्याचे काम सुरू आहे. काल शुक्रवारी सायंकाळी ग्रामीण वेशभूषेतील काही नक्षली घटनास्थळी पोहोचले आणि त्यांनी कामगारांना काम थांबवण्यास सांगितले. त्यानंतर रस्ता बांधकामावर असलेल्या जेसीबी, पोकलेन आणि महामार्गावरील वाहनाला आग लावली. यावेळी नक्षल्यांनी घटनास्थळी उपस्थित मजूर आणि चालकांनाही काही काळ ओलीस ठेवले होते. वाहने पेटवून दिल्यानंतर त्यांना सोडून देण्यात आले.
सूत्रांनी दिलेल्या माहितीनुसार, नक्षल्यांनी मजुरांना रस्ता बांधणीच्या कामात काम न करण्याचा सल्लाही दिला आहे. या घटनेची माहिती मिळताच पोलीस घटनास्थळी पोहोचले असून परिसरात शोधमोहीम सुरू केली.
![](https://www.thegdv.com/wp-content/uploads/ADD111-scaled.jpg)