– नवरगाव गाव संघटना व मुक्तीपथच्या प्रयत्नांचे फलित
The गडविश्व
गडचिरोली, २० नोव्हेंबर : तालुका मुख्यालयापासून १५ किमी अंतरावर वसलेल्या नवरगाव येथे २०१९ पासून अवैध दारूविक्री बंद होती. मात्र, ग्रामपंचायत निवडणूक काळात काही मूजोर विक्रेत्यांनी अवैध व्यवसाय सुरू केला. त्यामुळे भांडण-तंट्याच्या प्रमाणात वाढ झाली. या समस्येवर आळा घालण्यासाठी मुक्तीपथ व गाव संघटनेने विविध कृती, उपाययोजना केल्या. या प्रयत्नांमुळेच अवैध दारूविक्री बंद होऊन गावाची शांतता परत आली.
या गावात २०१९ पासुन दारुबंदी करून टिकवुन ठेवली होती. परंतु, निवडणुकिच्या काळात ५ ते ६ दारु विक्रेते इतर गावाहून आणलेली अवैध दारू विक्री करू लागले. सायंकाळी हा व्यवसाय सुरू व्हायचा. अशातच पोलिस विभागाच्या मदतीने ४ दारू विक्रेत्यांवर कार्यवाही करण्यात आली. तरी सुद्धा मूजोर विक्रेत्यांनी आपला अवैध व्यवसाय सुरूच ठेवला. परिणामी गावात भांडण, वाद, युवकामध्ये व्यसनाचे वाढते प्रमाण दिसू लागले. सोबतच महिला सुद्धा त्रस्त झाल्या होत्या.
गावातील दारूबंदी टिकवण्यासाठी मुक्तीपथने गावात जाऊन लोकांशी संवाद साधला. दारुबंदीचे महत्व पटवून दिले. गावात पोलिस पाटील व प्रतिष्ठित नागरिकांच्या उपस्थितीत गाव सभा घेण्यात आली. गावातील महिला व युवकांच्या पुढाकारातुन पुन्हा गाव संघटना सक्रिय करण्यात आली. त्यांनतर दारू विक्रेत्यांना नोटीस बजावण्यात आली. घरांची तपासणी करण्यात आली. जंगलपरिसरात शोधमोहीम राबवून दारूविक्रेत्यांचे अड्डे व साहित्य नष्ट करण्यात आले. यासाठी गावकऱ्यांचे सुद्धा सहकार्य लाभल्याने आज गावातील दारूविक्री बंद झाली आहे. गावकऱ्यांच्या मागणीनुसार व्यसनी रुग्णांना उपचार सुद्धा दिले जात आहे. सध्या गावात दारुबंदी असल्यामुळे शांतता व सुव्यवस्था टिकून आहे.
muktipath local news gadchirolinews gadchiroli win
