The गडविश्व
ता. प्र / कुरखेडा, दि. २९ : शहरातील एका जनरल स्टोर मध्ये रात्री रात्रौच्या सुमारास अवैधपणे प्रवेश करीत दुकानातील ३ लाखांची रोकड लंपास केल्याची घटना दोन दिवसांपूर्वी घडली. या प्रकरणी कुरखेडा पोलिसांनी दुकानात मदत करणाऱ्या एका बालकासह अन्य तीन जणांना पोलिसांनी ताब्यात घेऊन चौकशी अंती मुद्देमाल जप्त करण्यात आला आहे.
साहील हिरालाल वरलानी यांचे कुरखेडा शहरातील मुख्य मार्गावर जनरल स्टोरचे दुकान आहे. दोन दिवसांपूर्वी दुकानात चोरी झाल्याने त्यांनी पोलीस ठाण्यात अज्ञात आरोपीने प्रवेश करीत ३ लाखांची रोकड लंपास केल्याची तक्रार दाखल केली. तक्रारीच्या आधारे गुन्हा दाखल करून संशयावरून दुकानाच्या कामात सहकार्य करणाऱ्या एका विधीसंघर्षग्रस्त बालकाची चौकशी करण्यात आली असता त्याच्या कबुलीवरून त्याचे सहकारी पुन्हा २ विधी संघर्षग्रस्त बालक व एक आरोपी इब्राहिम इसराइल कुरेशी (वय २०) रा.कुरखेडा यांला ताब्यात घेण्यात आले. यावेळी त्यानी गुन्हाची कबूली देताच त्यांच्याकडून चोरीला गेलेल्या ३ लाख रुपयांपैकी २ लाख ८८ हजार ६९९ रुपये हस्तगत करण्यात आले व आरोपी विरोधात भारतीय न्याय संहिता २०२४ कलम ३३१(३)३३१(४)३०५(अ),३(५) अन्वये गुन्हा दाखल करण्यात आला.
सदर प्रकरणाचा तपास जिल्हा पोलीस अधिक्षक निलोत्पल, अप्पर पोलीस अधिक्षक एम.रमेश, उपविभागीय पोलीस अधिकारी रविन्द्र भोसले यांच्या मार्गदर्शनात ठाणेदार महेन्द्र वाघ, पोलीस उपनिरीक्षक वर्षा बोरसे, पोलीस हवालदार शेखलाल मडावी, संदेश भैसारे यांचा चमूने केला.
