– आंबेशिवनी येथे बाबासाहेब आंबेडकरांच्या पुतळ्याचे अनावरण
The गडविश्व
गडचिरोली, २८ मार्च : डॉ.बाबासाहेब आंबेडकर यांनी तयार केलेल्या भारतीय राज्यघटनेने दलित व मागासवर्गीयांना सशक्त करून सन्मानपूर्वक जीवन जगण्यास सक्षम केले आहे. मात्र, ही राज्यघटना कमकुवत करण्याचे प्रयत्न सुरू आहेत. पण देशातील जनता असे प्रयत्न हाणून पाडतील. बाबासाहेबांची राज्यघटना आणि विचारधारा पृथ्वीवरील कोणतीही शक्ती पुसून टाकू शकत नाही असे प्रतिपादन माजी मंत्री व काँग्रेसचे ज्येष्ठ नेते विजय वडेट्टीवार यांनी आंबेशिवनी येथे डॉ.बाबासाहेब आंबेडकर यांच्या पुतळ्याच्या अनावरण प्रसंगी बोलतांना केले.
बौद्ध समाज आणि तक्षशीला बुद्ध विहार यांच्या वतीने आयोजित या कार्यक्रमाच्या अध्यक्षस्थानी अखिल भारतीय रिपब्लिकन पक्षाचे केंद्रीय उपाध्यक्ष रोहिदास राऊत होते. बौद्ध भिक्षू भंते त्रिशरण पंचशील संघवत, आमदार डॉ.देवराव होळी, माजी आमदार डॉ.नामदेव उसेंडी, महाराष्ट्र काँग्रेसचे सरचिटणीस डॉ.नामदेव किरसान, माजी जि.प. अ‍ॅड. रामभाऊ मेश्राम, आरपीआयचे जिल्हाध्यक्ष हंसराज उंदिरवाडे, विधानसभा प्रमुख प्रदीप भैसारे, विजय बनसोड, कु. कविता मडावी, कु. सरिता टेंभुर्णे, सरपंचा यांची प्रमुख उपस्थिती होती.
पुढे बोलतांना आ.वडेट्टीवार यांनी सध्याच्या सरकारवर सडकून टीका केली. मागासवर्गीयांचे आरक्षण नाकारले जात आहे, लोकांचे लोकशाही हक्क दडपले जात आहेत आणि विशिष्ट विचारसरणीची सत्ता आणण्यासाठी धर्मनिरपेक्षतेची तत्त्वे नष्ट केली जात आहेत. हे देशासाठी आणि तेथील लोकांच्या प्रगतीसाठी अत्यंत धोकादायक आहे. राज्यघटनेच्या तत्त्वांवर देश चालवावा लागेल अन्यथा नागरिक उठून बंड करतील, असा इशाराही त्यांनी दिला.
आपल्या अध्यक्षीय भाषणात रोहिदास राऊत म्हणाले की, संविधान आणि बौद्ध धर्म या डॉ. बाबासाहेब आंबेडकरांनी देशाला दिलेल्या दोन महान गोष्टी आहेत. मानव कल्याणासाठी केलेल्या महान कार्यामुळे बाबासाहेब जगभर ओळखले जातात आणि त्यांची स्मारके आणि पुतळे जगभर उभारले गेले आहेत. ही प्रत्येक भारतीयासाठी अभिमानाची बाब आहे. समता आणि बंधुत्वावर आधारित विचारधाराच देशवासीयांचे कल्याण करू शकते आणि ती जपली आणि संरक्षित केली पाहिजे, असे मत त्यांनी व्यक्त केले.
यावेळी इतर पाहुण्यांनीही आपले मनोगत व्यक्त करून डॉ.बाबासाहेब आंबेडकर यांच्या कार्यावर प्रकाश टाकला. कार्यक्रमाच्या प्रारंभी भंते त्रिशरण पंचशील यांनी बुद्ध वंदनाचे पठण केले.
कार्यक्रमाचे प्रास्ताविक कु.सुनीता राऊत यांनी केले, संचालन जगन जांभुळकर यांनी तर आभार बाळकृष्ण राऊत यांनी मानले. कार्यक्रमाला आजूबाजूच्या गावातील लोक मोठ्या संख्येने उपस्थित होते. रात्री सुप्रसिद्ध गायक विकास राजा यांचा संगीतमय कार्यक्रम सादर करण्यात आला या कार्यक्रमाला मोठ्या संख्येने उपस्थित होते.
(The gadvishva) (the gdv) (gadchiroli ambeshioni) (MLA vijay wadettiwar) (MlA dr.holi) (rohidas raut) (Dr.B.R.Ambedkar)
