The गडविश्व
ता. प्र / कुरखेडा, दि. १६ : दारूमुळे मी माझा तरुण मुलगा गमावला तूम्ही तुमच्या मुलांना दारूपासून वाचवा, असे आवाहन एका मातेने कुरखेडा तालुक्यातील चिखली ग्रामसभेत केले. त्यानंतर चिखली गावात गांजा, जुगार, सट्टा, पत्ते प्रतिबंधासह अवैध दारूविरुद्ध समिती स्थापन करून अनेक महत्त्वाचे ठराव मंजूर करण्यात आले.
चिखली गावात कोणी दारू विकल्यास किंवा दारू विक्रेत्याचा जामीन घेतल्यास त्याला ५० हजार रुपयांचा दंड भरावा लागणार आहे. तसेच कोणत्याही बेकायदेशीर कामांना प्रोत्साहन दिल्यास त्यांना सर्व शासकीय योजनांपासून वंचित ठेवले जाईल, असा ठराव १५ ऑगस्ट रोजी झालेल्या विशेष ग्रामसभेत शेकडो महिलांच्या उपस्थितीत मंजूर करण्यात आला. अवैध दारूच्या प्रभावामुळे चिखली गावातील अनेक तरुणांचे जीवन उद्ध्वस्त झाले. याच महिन्यात दारूच्या नशेत गावातील एका तरुणाचा खून झाला होता. गावातील अवैध दारूमुळे गुन्हेगारी व गुन्हेगारी मानसिकता वाढल्याने अनेक कुटुंबे उद्ध्वस्त होण्याच्या मार्गावर आहेत. दारूच्या व्यसनामुळे आपला तरुण मुलगा गमावलेल्या एका मातेने गावातील तरुणांना वाचवण्यासाठी येथे आयोजित ग्रामसभेत लोकांना आवाहन केले होते. या निवेदनानंतर ग्रामसभेत उपस्थित नागरिकांसह गावातील शेकडो महिलांनी गावात अवैध दारू व्यवसाय करणाऱ्या लोकांच्या घरोघरी जाऊन आजपासून दारूविक्री न करण्याच्या सूचना दिल्या. जर कोणी दारू विकताना पकडले तर त्याला ५० हजार रुपये दंड भरावा लागेल. दारूविक्री करताना पकडलेल्या दारूविक्रेत्यावर गुन्हा दाखल करून गावातील एखाद्या व्यक्तीने जामीन घेतल्यास त्याला ही ५० हजार रुपयांचा दंडही भरावा लागेल, असा निर्णय घेण्यात आला आहे.
15 ऑगस्ट रोजी झालेल्या विशेष ग्रामसभेत शेकडो महिलांनी एकत्र येत गावात अवैधरित्या दारू विक्री होत असल्याचा मुद्दा उपस्थित केला. या ग्रामसभांना साधारणपणे गावातील फार कमी लोक उपस्थित असतात. मात्र चिखली गावात अवैध दारूमुळे बदललेल्या सामाजिक परिस्थितीमुळे त्रस्त झालेल्या महिलांनी आज मोठ्या संख्येने उपस्थिती नोंदवली.
अवैध दारूविरोधात नागरिकांनी मोर्चा उघडला, यापूर्वी दारू विक्री करताना पकडलेल्या गावातील ८ दारू विक्रेत्यांच्या घरी भेटी देऊन भविष्यात दारू विक्री करू नये, अशा सूचना केल्या. पहिल्यांदाच तहसीलमध्ये एवढ्या मोठ्या प्रमाणात दारू विक्रेत्यांविरोधात जनक्षोभ दिसून येत आहे.
४५ सदस्यांची दारू बंदी समिती स्थापन
आज चिखली ग्रामसभेत मोठ्या संख्येने उपस्थित ग्रामस्थांनी एकमताने पुरुषोत्तम तिरगम यांच्या अध्यक्षतेखाली ४५ सदस्यांची ग्रामस्तरीय दारूबंदी समिती स्थापन करून गावातील अवैध दारू बंदी व अवैध धंद्यांना आळा घालण्यासाठी संपूर्ण अधिकार सुपूर्द केले. स्थानिक पोलिसांच्या मदतीने सदर समिती
कायद्याच्या कक्षेत राहून दारूबंदी करेल आणि गावातील अवैध धंद्यांना आळा घालेल. या समितीच्या उपाध्यक्षा म्हणून सौ. उलशी जीवन हरामी, सदस्या कु. सुनीता रवी कुमरे, कु. पूर्णिमा दुर्गेश सोनटक्के (पोलीस पाटील), मेघराज बिसन बलोरे,हिरामण बन्सीलाल दमाहे, पुरुषोत्तम भटू नागोस, प्रभाकर मारोती बहेतवार, भगवानसास कृपालदास डहाळे, विलास लालचंद ढेकवार, नंदलाल बैसाखू दाऊद आसरे, राधेश्याम वाळुदेव, श्रीयुत शेळके, शशिकला सावजी मच्छिरके, नरेश कृपालदास दहाडे, कु. हिना ढेकवार, अनिल लक्ष्मण मच्छिर्के, कु. गीताबाई संसे लिल्हारे, कु. चंद्रकला मणिराम नैताम, कु. चंद्रकला किसन दरो, सो. कांतीबाई व्यंकटलाल मोहरे, लोकेश नंदलाल पोटवी, विनोद निर्मलदास डहाळे, कु. मुन्नीबाई दिनाजी आथोडे, कु. उषाबाई रमेश इंदूरकर, दुर्गेश बळीराम माच्छिर्के, महेश चरण बसोना, भारत इसूलाल माछिरके, सुधीर मन्साराम पोटवी, अरुण फागोजी ताराम,दिलीप राधेलाल कतलाम, प्रल्हाद भगवंत सीडाम, कोमल हरिदास बसोना, शिवचरण कालीचरण माछिरके, मोर्चेकर, दुर्गा शालिक मोहरे, विनायक ग्यानी लिल्हारे, सुनील महादेव सोनटक्के, कुंवरलाल भाऊलाल दाऊद आसरे, निताराम हगरू मडावी, शिवलाल आत्माराम सुकारे, कु. जयतुरा लिल्हारे,मुकेश सुमराज लिल्हारे, संमत अंकलू होळीकर आदींचा सामावेश आहे.
पोलिसांचे संपूर्ण प्रकरणावर बारीक लक्ष
कुरखेडा पोलीस ठाण्याचे काम पाहणारे ठाणेदार पोलीस निरीक्षक महेंद्र वाघ यांनी सदर प्रतिनिधीला सांगितले की, आज ग्रामसभेत हा मुद्दा उपस्थित झाल्याची पोलिसांना माहिती आहे. गावातील संवेदनशील परिस्थिती लक्षात घेऊन विभागाचे दोन पोलीस कर्मचारी ग्रामसभेत तैनात करण्यात आले होते. गावातील अवैध दारू विक्रीचा आरोप असलेल्या लोकांच्या घराघरात संपूर्ण ग्रामसभा व ग्रामसभेचे लोक आले असता कोणत्याही प्रतिकूल परिस्थितीला तोंड देण्यासाठी पोलीस सज्ज झाले होते. मात्र संपूर्ण ग्रामसभेची प्रक्रिया शांततेत पार पडली. चिखली गावाप्रमाणेच तालुक्यातील इतर ग्रामसभांनीही पुढे येऊन अवैध दारूबंदीसाठी पुढाकार घेण्याची गरज आहे. पोलीस सर्व प्रकारे गावे व ग्रामसभांच्या पाठीशी उभे आहे.
