The गडविश्व
गडचिरोली, दि. १२ : धानोरा तालुक्यातील आदर्श म्हणून ओळखली जाणारी मेंढा (लेखा) ग्रामसभा येथे जिल्हाधिकारी अविश्यांत पंडा यांनी काल भेट दिली. त्यांनी ग्रामसभा सदस्यांशी थेट संवाद साधत ग्रामस्वराज्याच्या प्रत्यक्ष अंमलबजावणीचे निरीक्षण केले.
यावेळी त्यांनी एकल सेंटरमार्फत स्थानिक युवकांना ‘बेअरफुट टेक्नीशियन’ म्हणून प्रशिक्षण देण्याच्या सूचना दिल्या. रोजगार हमी योजनेंतर्गत अशा प्रशिक्षित तरुणांकडून कामे घेण्याचेही निर्देश दिले.
ग्रामसभा अध्यक्ष देवाजी तोफा यांनी गावाच्या कामकाजाची माहिती दिली. २७ एप्रिल २०११ रोजी मेंढा (लेखा) ग्रामसभेला बांस विक्रीसाठी ट्रांझिट पास (T.P.) मिळवून ऐतिहासिक वनहक्क मान्यता मिळाली होती. सध्या या ग्रामसभेकडे एकूण १८०० हेक्टर सामुहिक वनहक्क क्षेत्र आहे. यापैकी ३०० हेक्टर क्षेत्रात मनरेगा अंतर्गत कामे सुरू असून, उर्वरित जंगल क्षेत्र ग्रामसभा स्वतः संवर्धित करत आहे.
ग्रामसभेतील निवडणुका बिनविरोध होतात, महिलांचा सहभाग लक्षणीय आहे, कोणत्याही नागरिकावर पोलिस केस नाही आणि गावात पारदर्शक लोकशाही प्रक्रिया प्रभावीपणे राबवली जाते. “दिल्ली-मुंबई आमचं सरकार, आमच्या गावात आम्हीच सरकार” हे गावकऱ्यांचे ब्रीदवाक्य आहे.
ग्रामस्तरावरच योजना आखून अंमलबजावणी करणारी ही ग्रामसभा स्वयंपूर्णतेकडे वाटचाल करत आहे. नोंदणीकृत कामांमध्ये बांबू लागवड, वनतलाव खोलीकरण, मिश्र रोपवाटिका यांचा समावेश असून, गौण वनोपजाच्या थेट खरेदीमुळे स्थानिक अर्थव्यवस्थेला बळकटी मिळत आहे.
यावेळी महिला महाविद्यालय गडचिरोलीचे प्रा. कुंदन दुपारे, समाजकार्य महाविद्यालय गडचिरोलीचे प्रा. भूपेंद्र गौर, जिल्हा परिवर्तन समिती गडचिरोलीचे टेक्निकल ऑफिसर श्री. गणेश ठावरे, नोडल अधिकारी सतीश राजू वड, लघुलेखक सिताराम नागोबाजी बुरे, ग्रामपंचायत मेंढा यांच्या सरपंच श्रीमती नंदताई दुगा, एकल सेंटरचे समन्वयक निलेश देसाई व चंद्रकांत किचक, तालुका महाग्रामसभा अध्यक्ष बाजीराव नरोटे, ग्रामसभा मांळदाचे अध्यक्ष कृष्ण भुरखुरिया आणि रोहयो, धानोरा येथील सहाय्यक कार्यक्रम अधिकारी श्रीमती किरण गज्जलवार व ग्रामस्थ उपस्थित होते.
