The गडविश्व
गडचिरोली, दि.१० : भरधाव दुचाकीची समोरून येणाऱ्या मालवाहू ट्रकवर जबर धडक बसून झालेल्या अपघातात तिघेजण तरुण जागीच ठार झाल्याची घटना ९ जानेवारी रोजी रात्रो साडेनऊ वाजताच्या सुमारास चंद्रपूर मार्गावरील मुरखळा गावानजीक घडली. अक्षय दसरथ पेंदाम (२३), अजित रघू सडमेक (२३), अमोल अशोक अर्का (२०, सर्व रा. गोविंदगाव ता.अहेरी अशी मृत तरुणांची नावे आहेत.
प्राप्त माहितीनुसार, मृतक तिघेही हे रात्रोच्या सुमारास नव्या दुचाकीने गडचिरोली कडे येत होते. दरम्यान मुरखळा नजीकच्या वळणावर समोरून येत असलेल्या ट्रकवर दुचाकी धडकली. दुचाकी भरधाव असल्याचे बोलल्या जात असून ट्रकला धडक बसताच तिघेहीजण जागीच गतप्राण झाले. अपघात एवढा भीषण होता की दुचाकीचा चक्काचुर झाला. घटनेची माहिती होताच नागरिकांनी धाव घेतली होती व पोलीसा कळविले. पोलिसांनी घटनास्थळ गाठून मृतदेह उत्तरीय तपासणी करिता ताब्यात घेऊन नंतर नातेवाईकांच्या स्वाधीन केले. सदर घेटनेने कुटुंबावर दुःखाचा डोंगर कोसळला आहे. पोलिसांनी ट्रक ताब्यात घेऊन पुढील कारवाई ची प्रक्रिया सुरू असल्याचे कळते.
भरधाव वाहनाने वाढली अपघाताची शक्यता
शहरात भरधाव वाहने मुख्य मार्गावरून धावत असल्याने अपघात होण्याची शक्यता वाढली आहे. शहरातील चारही मुख्य मार्गावर दिवसभर वाहनांची रेलचेल असते अशातच रेसिंग बाईकस्वार तसेच इतरही वाहन भरधाव धावत असल्याने अपघाताची शक्यता आहे. शहरातील खासगी शाळेतील विद्यार्थ्यांना नेआण करणाऱ्या वाहनांचा वेग सुद्धा अधिक असतांना दिसून येत आहे त्यामुळे त्यांच्या जीवाला सुद्धा धोका आहे.
