– आरडाओरड केल्याने वाघाने ठोकली धूम
The गडविश्व
गडचिरोली, दि.३० : गावालगत असलेल्या जंगलात सरपण गोळा करत असतांना दबा धरून बसलेल्या वाघाने महिलेवर हल्ला करून जखमी केल्याची घटना बोदली येथे शनिवार ३० डिसेंबर रोजी सकाळच्या सुमारास घडली. मंदाबाई बंडू कोठारे (५० वर्षे) रा. बोदली असे जखमी महिलेचे नाव आहे.
गावालगत जंगल असल्याने मंदाबाई व इतर काही महिला गावापासून १ किमी अंतरावर जंगलात सरपण गोळा करण्याकरिता शनिवारी सकाळी १०.३० वाजताच्या सुमारास गेल्या. दरम्यान सर्व महिला सरपण गोळा करीत होत्या. जंगल झुडपी असल्याने दबा धरून बसलेल्या वाघाने मंदाबाई यांच्यावर हल्ला केला. याचवेळी इतर महिलांनी आरडाओरड केली असता वाघाने धूम ठोकली मात्र यात मंदाबाई या किरकोळ जखमी झाल्या असून कपाळावर व डोळ्याजवळ पंज्याचे वार उमटले असल्याचे कळते. घटनेची माहिती वनविभागाला देण्यात आली. मंदाबाईवर जिल्हा सामान्य रुग्णालयात उपचार सुरू आहे.
जिल्ह्यात एकीकडे वाघ तर एकीकडे रानटी हत्तीच्या धुमाकुळ असल्याने नागरिकांत दहशत पसरली असून भीतीचे वातावरण आहे. वाघाचे हल्ले, रानटी हत्तीचे हल्ले याने जिल्हाभरात मानव वन्यजीव संघर्षही वाढताना दिसत आहे. यावर वनविभागाने वेळीच बंदोबस्त करण्यात यावा अशी मागणी जोर धरत आहे.
( the gdv, the gadvishva, gadchiroli, tiger attack, forest gadchiroli, bodli, elephant attack, armori, dhanora,korchi)
